早前在eBay bid到一部Rollei 35，是早期德國製的版本刻有Made in Germany by Rollei，配上40mm Tessar f3.5鏡頭，再看看拍賣刊登的照片，機身有小小花但無大損傷，賣家話己找師傅check咗機，話一切正常。
這部機外殼用料較薄，所以很易整花，加上三十幾年風吹雨打，所以只有這小小花就當睇唔倒，世界即時美好得多，落bid去也。由於競爭不算激烈，配合自己eBay的小小心得，最後以不錯的價錢成功投得此機，付款，等待送貨。
個多星期後它終於送到，打開的一刻，結結實實的把它拿在手中，那感覺真是興奮莫名，它那可伸縮的鏡頭，對齊的光圈和快門環是它的生招牌，只此一家，真係睇極都唔厭。空拍了幾張，聲音清脆！
問題來了，原來賣家並沒跟電，測光錶試唔到，Rollei 35用的是1.35V的625水銀電，很多6-70年代機皆用此電，後來因水銀唔環保而停產，現有多種代用電和Adapter適用，但要到尖沙咀買，真係有D掃興，奕日收工後急急飛去買電，但能買到代用電電壓是1.5V (只有WeinCELL MRB625鋅電是1.35V，網上有售但貴) ，高出的電壓令測光結果under一至兩級，好在它是全手動，可輕易作補償。
再試真D其它功能，鏡無霉，viewfinder明亮，光圈和快門環轉動順暢，好一個硬漢子；經得起風雨，再試快門，弊；出事！高速無問題，1/8秒以下快門走晒樣，1/2秒變2秒，心裡一沉，這是機械機的風濕骨痛老毛病，唯有再拿去維修。
放低部機給師傅，剩下的只有寂寞和等待，唉！
過咗漫長兩星期，下午收到師傅叫我攞機，收工急急脚去拿，不經不覺己一個月多，還未拍過一張相，今日終於和部機重逢，對一對serial no.，即時試一試個快門，每級都正常，太好啦，我菲林都帶咗係身啦！付款，起身想走，咪住，有唔妥，吓！點解機背中間粒螺絲唔見咗? 周旋咗一陣無結果，師傳話明天覆我。
之前
之後 希望明天會更好，希望明天會揾到……
